रणतभवंर सु आविया ओ बाबा दुन्डाला,
कोई ले रिद्ध सिद्ध ने साथ,
रिद्ध सिद्ध करो बिनायक सुंडाळा।।

चौकी घालां बेसणी ओ बाबा धुंडाळा
कोई दूध पखारां पांव,
म्हारे घर आवो बिनायक सुंडाळा
रणतभवंर सु आविया ओ बाबा दुन्डाला।।

चावळ रांधा ऊर्जळा ओ बाबा धुंडाळा,
कोई हरिये मूंग री दाळ,
रिद्ध सिद्ध करो बिनायक सुंडाळा,
घी बरतांवां टोकणा ओ बाबा धुंडाळा,
कोई जालापुर री खांड,
म्हारे घर आवो बिनायक सुंडाळा,
रणतभवंर सु आविया ओ बाबा दुन्डाला।।

थाळ परोसे पदमणी ओ बाबा धुंडाळा,
कोई झांझर रे झणकार,
रिद्ध सिद्ध करो बिनायक सुंडाळा,
जीमत निरखां आंगळी ओ बाबा धुंडाळा,
कोई बोलत निरखां दांत,
म्हारे घर आवो बिनायक सुंडाळा,
रणतभवंर सु आविया ओ बाबा दुन्डाला।।

ऊँची मेड़ी रावटी ओ बाबा धुंडाळा,
कोई दिवलो जगे मसाल,
रिद्ध सिद्ध करो बिनायक सुंडाळा,
बठे बिनायक पोढ़िया ओ बाबा धुंडाळा,
कोई रिद्ध सिद्ध चांपे पांव,
म्हारे घर आवो बिनायक सुंडाळा,
रणतभवंर सु आविया ओ बाबा दुन्डाला।।

रणतभवंर सु आविया ओ बाबा दुन्डाला,
कोई ले रिद्ध सिद्ध ने साथ,
रिद्ध सिद्ध करो बिनायक सुंडाळा।।

श्री गजानन भगवान की जय।। श्री गणेशाय नमः।।
जय जय श्री गणेश।।ॐ गणेशाय नमः।। जय श्री गणेश।।