కన్నులు వెన్నెల కురిపించిన వేళ

మావి చిగురులు మేసి
కోయిల తీయగా కూసింది..
నీ వలపుతలపులు మేసి
మనసు రాగాలు తీసింది...

కారు మబ్బుల సొగసు
వెండిపూతతో మెరిసింది
అందాల నీ మోము సొగసు
గుబురు మీసాలతో మెరిసింది..

వేణుగాన సరళికి
బృందావని పులకించింది
నీ మృదుపాద రవళికి
హృదయమే నర్తించింది..

చిరుజల్లులు కురిసిన వేళ
ప్రకృతి పరవశించింది
కన్నులు వెన్నెల కురిపించిన వేళ
మనసు ఆనంద తాండవమాడింది..

కలువ చంద్రుని రాక కొరకు
ఆత్రముగా వేచింది
ఈ రాధ మాధవుని కొరకు
తపములే చేసింది.